Dy
janë forcat që vlen të përmenden, si aktorë të vetëm, në zallahinë e
karnavaleve të zgjedhjeve në Shqipëri; Fryma e Re Demokratike dhe Aleanca Kuq e
Zi. Këto janë dy forca politike me program, moral e organizim politik krejt të
kundërt. E para, Fryma e Re Demokratike, komandon një vëmendje analitike
dhe kujdes shprehimor. E dyta, Aleanca Kuq e Zi, përveç emrit të spikatur,
provokon një ndjesi humori, apo thjesht një lakim buzagaz të kokës.
Meqënëse
nuk mund të flitet shumë për Aleancën Kuq e Zi, vërejtjet shprehimore mund të
filllojnë e të mbarojnë me marshimin sharlatan të kreut të këtij organizimi, në
7 Prill, nën thirrjen komike të korit – O Kreshnik o hero, gjithë Shqipëria ty
të do. Nën këtë petk përkëdhelës, Kreshniku marshonte në procesionin më
Donkishotesk, të realizuar gjatë dy dekadave të fundit në Shqipëri.
Fishkëllima
e ndërtimit të një Njëshkëje tjetër në arenën politike shqiptare, përfundoi me
pazarin parazgjedhor, kushtet e prezantuara dhe zotimin – tashmë të paftyrë – të
përbetimit ndaj aleancës vetëm me popullin shqiptar (patjetër, nëse nuk i plotësoheshin
kushtet, përndryshe – vafsh o popull, si me të tjerë!). Kaq për Aleancën Kuq e
Zi – një nismë e dhunuar në lindje.
Fryma
e Re Demokratike, ndryshe nga pothuaj të gjitha forcat e tjera politike në
Shqipëri – këtu merren në vëmendje partitë domethënëse, jo disa grupime të
turpshme, të cilat janë emërtuar dhe regjistruar si parti politike, vetëm për
një rrogë) – ajo hyn në zgjedhje e vetme. Karnavalet e zgjedhjeve dhe marrëveshjet
celulare janë kaq gjithëpërfshirëse, sa kushdo ka bindje se një interesim, qoftë
edhe i tërthortë nga FRD, do të përshpejtonte gishtat e madhorëve në tastierat
e lodhura të celularëve. Porse FRD siguroi papajtueshmërinë me të dyja forcat
madhore politike, Partinë Demokratike dhe Partinë Socialiste. Në këtë paragraf,
ndershmëria politike me moralin dhe anëtarësinë e vet përbën një risi në politikën
shqiptare.
Megjithkëtë,
duke lënë mënjanë profecinë e rezultatit të zgjedhjeve në Shqipëri, – do të
ishte aq i pasaktë sa edhe parashikimet Bajern vs Barcelona, sepse fatkeqsisht,
zgjedhjet janë kthyer në një sport me shpërblime përkatëse në kurriz të
shqiptarëve – në këtë fillesë politike, ‘profecia’ analitike e ardhmërisë së
FRD është intriguese.
Përballë
dy partive madhore, FRD pozicionohet si efekt në rritje, dhe me peshë në
politikën e ardhme kombtare. Strukturimi i saj nismëtar shquan qetësinë e
debatit politik dhe qartësinë e programit gjithëpërfshirës. Në këtë bust, të ndërtuar
organikisht prej shumë aktorëve në këtë parti, prezenca në vijim do të ndikojë
zhvillimet politike shqiptare në shumë aspekte.
Për
Partinë Socialiste, FRD nuk përbën një kërcënim antarësor. Këto dy forca kanë ndarje të qenësishme politike. Për PS, FRD-ja përbën një kundërshtar
potencial të civilizuar, të organizuar dhe me reputacion në rritje. Përballë Frymës së Re Demokratike – nëse linja politike dhe organizative nuk ndryshon –
Partia Socialiste detyrohet të riorganizojë psikologjinë e opozicionit të saj
politik. Në fakt, Fryma e Re sjell frymën e re të etikës, në luftën politike
shqiptare.
Në
këtë formim, mundësia e një debati ndërmjet një përfaqësuesi të FRD-së dhe të
PS-së me tone rugaçërie është pothuaj zero. Kjo mënyrë debatimi, është kthyer tashmë
një ëndërr për shqiptarët – ndjekës të debateve politike. Shpërthimet dhe shkëmbimet
e sharjeve ndërmjet analistëve të njëanshëm dhe politikanëve të sotëm, ndërsa shpalosin
një kategori neverie rrenjësuar nga injoranca e tyre, ata janë primitive e të papranueshme.
Ndryshe
nga raporti opozitar me PS-në, FRD-ja është një ndërtim mbi degradimin natyral
të Partisë Demokratike. Ajo çfarë nënkuptohet me ‘degradimin natyral’ nuk është
arritja-mosarritja, suksesi-dështimi, ndershmëria-pandershmëria,
demokracia-autokracia etj., të debatit mbi zhvillimet e sotme në Partinë
Demokratike. Qëllimi i këtij materiali nuk synon analizën e punës politike të
PD-së. Degradimi natyral i Partisë Demokratike është ecuri natyrale e vendosjes së saj
organizative në hapësirë dhe kohë.
Pa
debat, strukturimi i Partisë Demokratike është i formatuar rrenjësisht përreth
kryetarit të saj. Kjo formë e thjeshtë, por guackore e strukturimit, përveç
problemeve të tjera, ajo nuk lejon depërtime vazhdueshmërie në udhëheqësi. Bazuar
në ciklin kohor të cdo organizmi, me fillim dhe fund, mënjanimi i njeriut nga aktivitete normale, është proces natyral dhe njerëzisht i pashmangshëm. Ky është një
realitet i pakontrollueshem dhe jashtë të gjitha kapaciteteve
njerëzore.
Argumenti
për këtë efekt, pra degradimin e PD-së në zhvillimin natyral, vjen në mbështetje
duke parashtruar një pyetje të vetme; Kush vijon në udhëheqjen e kësaj force
politike? Arena e tashme e shpurës së kryetarit aktual të PD-së, fatkeqsisht nuk
cilëson asnjë kandidat të mundshëm, me aftësi organizative përmbledhëse, me
karizmën dhe aktrimin politik (këtu atributi është tejet personal) të
barazueshme me të, apo së paku, me cilësi të përafërta.
Në
këtë skenar të ardhshëm, Partia Demokratike është e destinuar të ndërmarrë disa
rrugë procesore; partia përfundon ciklin dhe shpërbëhet; anëtarësia shpërndahet
ndër parti të tjera; partia ndahet në forca politike nën udhëheqësine e të përzgjedhurve
konkurues, si mjet rrogë-ruajtjeje.
Në
çdo skenar të ardhshëm të zhvillimeve në PD, FRD-ja është përfituese. Në një
metaforë analitike, FRD-ja bëhet nesër, ajo ç’ka PD-ja duhet të jetë sot. Sidoqoftë
së nesërmes metaforike, ndërsa jetëgjatësia e FRD-së nuk i mundëson asaj, një
reklamim më të gjerë kombtar, ajo përbën në këto zgjedhje, një kënd
mbështetjeje për të gjithë ata, të cilët të tashmen dhe të ardhmen demokratike,
nuk e shohin më, me dylbitë e PD-së.
Në fund të fundit, ky është thelbi i demokracisë; një mendim i lire – tjetër, një mënyrë përzgjedhjeje e lirë – tjetër.
Albert Baja
No comments:
Post a Comment